قصيدة إبتسام وسميرة
يا بسمة الدنيا ويا روح الأيام
يكفي عتب يكفي زعل يكفي غيرة
كل الذي في بالك يدور أوهام
خلي الوهم عنك وفضيها سيرة
محدن سكن هالقلب من عشرة أعوام
ما غيرك انتي ...وابتسام وسميرة
وهند وسعاد وريم وفطوم وأحلام
وعليا ودلال وشوق وأسما وأميرة
واذكر بعد يوم اني في رحلة الشام
مت ف سهى وسوسن وريما وميرا
وفي القاهره حبيت زيزي وريهام
وناهد وعبله أم العيون المثيرة
ومريت ع بيروت وحبيت ميريام
وطحت بهوى كارول طيحه كبيرة
يعني اذا جينا نتكلم بالأرقام
عشرين وحده مع زيادة يسيرة
عشرين ما يسوون بك ظفر الإبهام
ولا يجون بوسط قصرك حصيرة
مثل النجوم تشع في وقت الإظلام
وتختفي لا جات شمس الظهيرة
يفداك قلب(ن) منقسم عشرة أقسام
متعلق بقلبك ولا شاف غيره
دامه تعلق فيك ماعاد ينلام
ما دامك انتي له شهيقه وزفيره
وانتي نخاعه اللي تغلغل بالعظام
وانتي الحنان اللي يقرر مصيره
وان كان كدر خاطرك ريم وأحلام
وشلة سميرة وابتسام ومنيرة
بحكم عليهن كلهن بحكم الإعدام
وأنشر خبرهن في قناة الجزيرة
قصيدة أكذب عليك
أكذب عليك ان قلت لبعادك أطيق
في غيبتك ما للهموم انفراجه
الهم طوق راحة القلب تطويق
ملت بساتين الفرح من علاجه
آنام بجروحي وبجروحي آفيق
يوم الدهر طفّي بوجهي سراجه
ياخي تعاااال أرجوك بهدلني الضيق
إرسل رسالة.. سبّني.. قول حاجه
تعال شق الصدر.. شق المعاليق
شوف القلب في ضيقته وانزعاجه
يرضيك أصومك وأرجع أنقض بك الريق
وانته تذوقني الهوان وعجاجه
لو تدري بقدرك ما بين المخاليق
ما كنت عكرت لحبيبك مزاجه
قصيدة برازيلي مفتح شوية
ما عادت اجروحي إلى الحين حية
راحت عليك وخيرها ف البقية
رحتي وأنا مثل الجبال الرواسي
لا تحسبيني في حسابك ضحية
ما حرك غيابك من الراس شعرة
القلب صابر والمدامع عصية
وأما رباطة جأشي اللي بخبرك
آبشرك ان بعدها هيه هيه
رحتي رجعتي ما يهمني بتاتا
ماني بناقص وجع راس وأذيه
وأنا تراني مثل منتي تشوفي
لي هيبة بين القلوب القوية
من كثر مالي بين هالناس هيبة
لو شافني ضابط يأدي التحية
وأنا ترا ماني بمحتاج مثلك
أحتاج مثلك !! لا لا هذي قوية
كل الحسن فيني وربي خلقني
حياني امقفل وفيني ثنية
واما السمار اللي كسى وجنتيني
كني برازيلي مفتح شوية
بسم الله حولي يخزي العين عني
تف تف تتف بسم الله حولي وعليه
يعني اذا رحتي على غير رجعة
مليون بنت غيرك تموت فيه
شوفي أنا لو كنت مثلك منتف
حافي ولا لي صيت بين البرية
ويحبني واحد تعدى زمانه
له في صروف المجد روحه وجيه
ما راح أتركه ليش ! لأني أعرفه
من وين ألاقي بين هالناس زيه
حكمه وطيبه واتزان ورزانه
احساس صادق حنكه وجاذبية
لكن تراها ما تفيد الإجابة
ما دامت أسئلة الجماعة غبية
وانتي كثار اللي يحبون طبعك
لا تشغلي بالك بهذي القضية
وان ما رضى أهل الشيم بالإهانه
يرضى بها أهل النفوس الدنية
وسلامتكم
الرئيسية